Mae wedi bod yn haf cyffrous o gydweithio rhyngwladol i CASCADE, gyda theithiau i Tsieina, yr Eidal, yr Almaen a Denmarc. Yn fwyaf diweddar, teithiodd yr Athro Donald Forrester a Dr Lorna Stabler i Copenhagen i gynnal ysgol haf ar gyfer y “Centre for Better Childhoods” ym Mhrifysgol Coleg Copenhagen.
“Centre for Better Childhoods”
Mae’r “Centre for Better Childhoods” yn ganolfan ymchwil newydd fawr ac amlddisgyblaethol yn Nenmarc, gyda’r nod o wella gwasanaethau a chanlyniadau i blant dan 7 oed drwy ymchwil werthuso o safon uchel gyda gweithwyr proffesiynol. Mae’r Ganolfan yn bartneriaeth rhwng Prifysgol Coleg Copenhagen, Sefydliad Novo Nordisk, Sefydliad LEGO a’r TrygFonden. O’r cychwyn cyntaf, mae’r Athro Forrester wedi bod yn rhan o lunio’r ganolfan newydd fel Cyfarwyddwr Ymchwil Sylfaenol.
Yr Ysgol Haf a dulliau realaidd
Cafodd yr Athro Forrester a Dr Stabler eu gwahodd i gynnal ysgol haf gyntaf y Ganolfan gyda’i gilydd. Y nod oedd dod â ymchwilwyr o wahanol feysydd ynghyd sy’n gweithio gyda phlant 0–6 oed a’u teuluoedd, i’w hysbrydoli a’u cefnogi i ddatblygu ceisiadau a phrosiectau ymchwil llwyddiannus.
Cychwynnodd yr Athro Forrester drwy roi cyflwyniad a chraffu ar y ‘rhyfeloedd dulliau’, gan roi sylfaen mewn epistemoleg, ontoleg a dyluniad ymchwil. Arweiniodd Dr Stabler y ddau ddiwrnod canlynol, yn dysgu am ymchwil arddull realaidd, gan roi’r wybodaeth ddamcaniaethol ac ymarferol i’r cyfranogwyr gynllunio a chynnal adolygiadau neu werthusiadau realaidd eu hunain.
Ar y diwrnod olaf, arweiniodd yr Athro Forrester sesiwn i uno’r dysgu i gamau allweddol, fel y gallai’r cyfranogwyr ddatblygu eu cynigion prosiect eu hunain.
Roedd yr ysgol haf yn llwyddiannus iawn – gyda 56 o gyfranogwyr wedi cofrestru ar draws y 4 diwrnod. Daeth y rhai oedd yn bresennol o adrannau o fewn Prifysgol Coleg Copenhagen, colegau prifysgol eraill o bob cwr o Denmarc, ysbyty lleol, ac hyd yn oed o brifysgol yn Sweden.
Roedd y sesiynau’n gymysgedd o ddysgu gan arbenigwyr, ymarferion grŵp, dysgu cyd-i-gyd – ac ychydig o hwyl!
Yn ystod gweithgaredd creadigol, gofynnwyd i’r cyfranogwyr ddod o hyd i ffordd wahanol o gyfleu craidd eu neges ymchwil. Defnyddiodd un cyfranogwr hetiau a bagiau i ddangos y baich o’r tasgau a’r rolau niferus mae gweithiwr cymdeithasol yn eu cario.
Adborth gan gyfranogwyr
Roedd yr adborth yn hynod gadarnhaol – roedd cyfranogwyr yn teimlo eu bod wedi cael sylfaen gref mewn dulliau ymchwil oedd yn berthnasol i’w meysydd, yn ogystal â’r sgiliau a’r hyder i fynd â’u syniadau ymchwil ymhellach.
Dywedodd un cyfranogwr:
“Dysgais fwy am bwysigrwydd diffinio a chulhau fy mhroblem ymchwil, a sut i gyfathrebu’r her a’m datrysiad arfaethedig yn glir ac yn gryno. Daeth hyn yn arbennig o amlwg i mi yn ystod yr ymarferion grŵp, lle cefais lawer o fewnbynnau gwerthfawr a syniadau newydd ar gyfer fy mhrosiect.”
Pwysigrwydd i CASCADE
Mae cydweithrediadau fel yr un gyda’r “Centre for Better Childhoods” yn bwysig iawn i’r hyn mae CASCADE yn ei wneud. Mae gennym ni arbenigedd mawr o ran sut mae gofal cymdeithasol i blant yn gweithredu yn y DU – beth sy’n gweithio a beth nad yw’n gweithio.
Ond mae deall sut mae gofal cymdeithasol plant a disgyblaethau eraill yn gweithio mewn gwledydd eraill i gefnogi plant a’u teuluoedd yn ein helpu i feddwl yn fwy creadigol ac arloesol am sut i wella arferion yng Nghymru.
Yn ogystal, mae cael ein gwahodd i rannu ein gwybodaeth ac arbenigedd yn rhyngwladol yn gydnabyddiaeth o’n gwaith, ac yn gyfle i gynyddu effaith ein hymchwil gyda chynulleidfa fyd-eang.
Ar hyn o bryd mae Dr Stabler yn aros yn Copenhagen am 3 mis fel ymchwilydd gwadd, i ddyfnhau’r cydweithio rhwng CASCADE a’r “Centre for Better Childhoods”.