Amdanom Ni

Blaenoriaethau Strategol CASCADE

1. Lleihau Anghydraddoldebau Strwythurol

Pam fod hyn yn bwysig

Mae lle mae plentyn yn tyfu, incwm ei aelwyd, a’i ethnigrwydd i gyd yn dylanwadu ar y posibilrwydd y bydd yn dod i gysylltiad â gofal cymdeithasol plant – yn ogystal â’r gefnogaeth y bydd yn ei chael ar ôl gwneud hynny. Nid gwahaniaethau ar hap yw’r rhain; maen nhw’n batrymau sy’n cael eu gyrru gan amodau strwythurol y gellir eu deall, eu herio a’u newid.

Mae ymrwymiad Cymru fel cenedl Marmot yn golygu bod mynd i’r afael â phenderfynyddion cymdeithasol iechyd a lles yn elfen ganolog mewn polisïau cyhoeddus. Mae CASCADE mewn sefyllfa unigryw i ddod â thystiolaeth drylwyr i’r agenda hon ym maes gofal cymdeithasol plant. Gall ddefnyddio rhaglen hirhoedlog o ymchwil feintiol ac ansoddol sydd wedi helpu i amlygu anghydraddoldebau o ran lles plant ledled y DU ac yn rhyngwladol.

Ffocws ein hymchwil

Mae rhaglen anghydraddoldebau CASCADE yn defnyddio data gweinyddol ar raddfa fawr i ddatgelu sut mae ffactorau fel amddifadedd, ethnigrwydd ac incwm aelwydydd yn arwain at gysylltiad anghyfartal â gofal cymdeithasol. Fe wnaeth ein hastudiaeth nodedig o’r pedair gwlad helpu i lunio’r ymchwil gynyddol am anghydraddoldebau o ran lles plant. Rydym bellach yn dyfnhau’r gwaith hwn drwy gynnal astudiaethau ansoddol sy’n edrych ar sut mae arferion ar lawr gwlad yn ymateb i dlodi a phenderfynyddion cymdeithasol eraill. Ar ben hynny, rydym yn meithrin partneriaethau trawsddisgyblaethol i ddatblygu ymchwil newydd a chynhwysol sy’n rhoi llais cryfach i gymunedau dan anfantais.

2. Cefnogi Perthnasoedd Cariadus

Pam fod hyn yn bwysig

Perthnasoedd cariadus, sefydlog a pharhaol sydd wrth wraidd yr hyn sydd bwysicaf i blant, ac mae tystiolaeth yn dangos bod cysylltiadau cymdeithasol yn allweddol i gyflawni deilliannau cadarnhaol. Ac eto, gall yr union systemau sydd wedi’u cynllunio i amddiffyn plant amharu yn anfwriadol ar y cysylltiadau y maen nhw’n dibynnu arnyn nhw. Mae deall sut mae perthnasoedd yn cael eu ffurfio, eu cynnal a’u diogelu drwy gydol y cyfnod y mae plentyn yn ymwneud â gofal cymdeithasol yn hanfodol os yw gwasanaethau am wneud mwy o les na niwed.

Mae CASCADE yn rhoi perthnasoedd – rhwng plant ac aelodau o’u teulu, rhwng pobl ifanc a’u cyfoedion, a rhwng teuluoedd a’u rhwydweithiau ehangach – wrth wraidd ei ymchwil, gan ofyn sut y gall y system gofal cymdeithasol feithrin y cysylltiadau sy’n llunio hunaniaeth, lles a deilliannau hirdymor yn fwy effeithiol.

Ffocws ein hymchwil

Mae ein hymchwil yn cwmpasu perthnasoedd teuluol, sefydlogrwydd perthnasoedd, a phrofiadau plant mewn gofal a thu hwnt. Rydym yn edrych ar sut y gall gwasanaethau amddiffyn a chryfhau’r perthnasoedd sy’n bwysig i blant, gan gynnwys y rhai sy’n parhau ar ôl i’w cysylltiad ffurfiol â’r gwasanaethau ddod i ben. Mae’r gwaith sy’n cael ei wneud ar hyn o bryd yn edrych ar sut mae parhad mewn perthnasoedd yn edrych yn ymarferol, sut y gall dulliau cyfranogol roi lle blaenllaw i safbwyntiau’r plant, a pha amodau o ran polisïau ac arferion sy’n helpu i gynnal cysylltiadau ystyrlon dros amser.

3. Hyrwyddo Arferion Rhagorol

Pam fod hyn yn bwysig

Yn y pen draw, mae ansawdd gofal cymdeithasol i blant yn dibynnu ar y bobl sy’n ei ddarparu – eu sgiliau, eu hyder a’u barn broffesiynol. Ac eto, nid ydym yn gwybod digon o hyd am hanfodion arferion rhagorol mewn gwaith cymdeithasol bob dydd o dan bwysau uchel. Wrth i’r gweithlu esblygu ac wrth i offer newydd, gan gynnwys deallusrwydd artiffisial, ddechrau gael ei ddefnyddio yn rhan o arferion, mae gwir angen ymchwil sy’n gwneud yn siŵr mai’r gweithwyr proffesiynol a’r teuluoedd maen nhw’n gweithio gyda nhw yw’r ffocws o hyd.

Mae CASCADE wedi ymrwymo i adeiladu sylfaen dystiolaeth drylwyr a chadarn ynglŷn â hanfodion arferion effeithiol – nid mewn theori, ond yn y sefyllfaoedd go iawn hynny pan mae gweithwyr proffesiynol, plant a theuluoedd yn dod wyneb yn wyneb.

Ffocws ein hymchwil

Mae ein rhaglen ymchwil yn cynnwys dau faes eang. Mae’r cyntaf yn edrych ar sut mae gweithwyr proffesiynol yn siarad â theuluoedd ac yn gweithio gyda nhw – y sgiliau cyfathrebu, y dulliau perthynol a’r technegau gwaith uniongyrchol sy’n sail i gefnogaeth effeithiol, o weithwyr cymdeithasol cymwys i’r gweithlu ehangach. Mae’r ail yn edrych ar sut mae gweithwyr proffesiynol yn asesu, ystyried a phenderfynu – y prosesau rhesymu sy’n sail i waith cymdeithasol da, a sut mae technolegau sy’n dod i’r amlwg fel offer AI sy’n cynorthwyo penderfyniadau yn dechrau ail-lunio’r maes hwn.

4. Sefydliadau a Systemau sy’n Newid

Pam fod hyn yn bwysig

Mae arweinyddiaeth, diwylliant, goruchwyliaeth, adnoddau a dyluniad systemau i gyd yn dylanwadu ar i ba raddau y gall gweithwyr proffesiynol ddod i farn yn hyderus, meithrin perthnasoedd o ymddiriedaeth, a gwneud gwaith da. Creu’r amodau sefydliadol cywir yw un o’r dulliau mwyaf pwerus o wella gofal cymdeithasol plant ar raddfa fawr.

Mae CASCADE yn dod ag ymchwil ynghyd sy’n edrych ar sut mae sefydliadau yn dysgu, yn gwella ac yn addasu – yn ogystal â sut y gall arweinyddiaeth a llywodraethu greu’r amodau lle gall arferion ffynnu sy’n seiliedig ar dystiolaeth, perthynas a hawliau.

Ffocws ein hymchwil

Mae gan CASCADE raglen ymchwil sylweddol sy’n edrych ar sut mae ffactorau sefydliadol a systemig yn dylanwadu ar ansawdd arferion. Mae hyn yn cynnwys astudiaethau am ailgynllunio gwasanaethau, datblygu’r gweithlu, gwyddor gweithredu ac arloesedd – gan archwilio sut mae dulliau sy’n seiliedig ar dystiolaeth yn cael eu mabwysiadu, eu haddasu a’u cynnal mewn lleoliadau go iawn. Rydym yn cydweithio’n agos ag awdurdodau lleol, cyrff cenedlaethol ac ymarferwyr i ddeall newid o’r tu mewn, gan gyfuno camau gwerthuso trylwyr â pherthnasedd ymarferol.

---

Partneriaeth Seilwaith CASCADE

Mae ein harbenigedd yn dod â phartneriaeth eithriadol ynghyd. CASCADE yw’r brif ganolfan ar gyfer ymchwil werthusol ym maes gofal cymdeithasol plant yn y DU. Mae’n rhan o Ysgol y Gwyddorau Cymdeithasol (SOCSI), canolfan ragoriaeth flaenllaw yn y gwyddorau cymdeithasol ac ymchwil addysg sydd ag arbenigedd penodol mewn dulliau meintiol. Mae’r Ganolfan Treialon Ymchwil (CTR) yn arweinydd cenedlaethol cydnabyddedig ar gyfer treialon a dulliau cysylltiedig. Roedd yr Ysgol Seicoleg yn 2il am ansawdd ymchwil yn y Fframwaith Rhagoriaeth Ymchwil diweddaraf ac mae SAIL yn cynnig cysylltiadau data o’r radd flaenaf. Gyda’n gilydd credwn y gallwn greu newid sylweddol yn ansawdd ymchwil gofal cymdeithasol plant sydd heb ei hail yn y DU a sut caiff ei defnyddio. Yn benodol, gallwn gynnig treialon a gwerthusiadau o ansawdd uchel; cysylltu data er mwyn deall canlyniadau tymor hir, a chynnwys defnyddwyr gwasanaeth (ein cyhoedd) ym mhob rhan o’n hymchwil. Rydym am i’r tair elfen hyn ryngweithio â’i gilydd i gynhyrchu ymchwil heb ei hail.

---

Rydym yn ymfalchïo mewn cefnogi a datblygu pobl drwy gydol eu gyrfaoedd, gan gynnwys arwain y genhedlaeth nesaf o arweinwyr ymchwil. Cynnwys y rhai sydd â phrofiad o gael gwasanaethau ar draws ein gwaith mewn ffyrdd canlyniadol ac ennyn diddordeb y sector mewn ymdrechion parhaus ac ystyrlon i ddeall gwybodaeth ymchwil a’i defnyddio.

Nid trwy ein gwaith ymchwil yn unig yr ydym yn gwneud hyn. Rydym hefyd yn mynd ati mewn modd ymarferol i ddosbarthu, hyfforddi ac ymgysylltu â’r cyhoedd trwy ein prosiectau ExChange a’r tîm Cynnwyd y Cyhoedd.