Addysgu gweithwyr cymdeithasol y dyfodol gyda Grŵp Rhieni Cascade

Y nod oedd rhoi cipolwg i fyfyrwyr ar brofiad bywyd rhieni sy’n gweithio gyda’r gwasanaethau cymdeithasol. Ceisiodd y sesiwn ddatblygu eu hymarfer proffesiynol yn y dyfodol, a hynny trwy feithrin eu hempathi.

“Mae cael rhieni i gymryd rhan wedi bod yn amhrisiadwy. Mae eu straeon a’u cipolwg yn cynnig persbectif i fyfyrwyr na allan nhw ei gael o werslyfrau. Mae’n fraint eu cael i lunio’r ffordd rydyn ni’n dysgu empathi a meithrin perthynas ym maes gwaith cymdeithasol.” 

Yr Athro David Wilkins

I ddechrau, fe wnaeth yr Athro Wilkins a’r grŵp drafod sut i gefnogi’r cwrs, gan sicrhau lles y rhieni oedd yn cymryd rhan ar yr un pryd. Fe wnaethon ni setlo ar gyfuniad o gyflwyniadau ar ffurf darlithoedd ac amser mewn grwpiau bach yn ystyried rhai senarios sy’n seiliedig ar ymarfer.

Bu bron i Storm Bert chwalu ein cynlluniau, ond fe wnaeth y rhai oedd yn gallu teithio i Gaerdydd ymuno â ni wyneb yn wyneb, wrth i’r lleill ymuno ar-lein. Yn ystod y ddarlith, eglurodd ein rhieni sut cafodd y grŵp ei ffurfio, y gwaith maen nhw’n ei wneud ac fe wnaethon nhw nodi themâu allweddol. Siaradon nhw am bwysigrwydd gweld rhieni fel partneriaid, meithrin empathi, gofalu am eu lles eu hunain, cefnogi pawb yn y teulu – nid y plentyn yn unig – a chydnabod y gwahaniaeth y gall gweithiwr cymdeithasol da ei wneud. Rhannodd rhai o’n haelodau eu profiadau a gorffennon nhw’r cyflwyniad gyda rhai cwestiynau a gafodd eu dewis ymlaen llaw. Cyn cymryd rhan yn y seminarau gyda’r myfyrwyr. Cafodd y ddarlith effaith fawr ar y myfyrwyr.

“Roedd yn hynod fuddiol gwrando ar brofiadau bywyd y rhieni. Roedden nhw’n bwerus ac yn ysbrydoledig. Fe wnaethon nhw bwysleisio’r angen i ddangos empathi i bobl a’u deall, waeth beth sydd wedi digwydd.”

“Roedd yn hyfryd clywed safbwyntiau go iawn ar brofiadau gwaith cymdeithasol. Roedd yn arbennig o dda gwrando ar bobl yn esbonio bod neb yn berffaith a’r pethau bychain y gallwn ni eu gwneud i helpu, megis tynnu lluniau a chynnig atgofion.”

Dyfyniadau gan fyfyrwyr am y sesiwn

Fe wnaeth y sesiwn hon bwysleisio pa mor bwysig yw gwrando ar bobl sydd â phrofiad bywyd o wasanaethau, a dysgu o’u profiadau. Mae hefyd yn dangos sut y gall cynnwys y cyhoedd helpu i bontio’r bylchau rhwng hyfforddiant academaidd, ymarfer ac ymchwil.

Ni fyddai hyn wedi bod yn bosibl heb ymroddiad a dewrder ein rhieni a’u hymrwymiad i wella gwasanaethau cymdeithasol. Cafodd y cyfarfod effaith gadarnhaol arnyn nhw hefyd.

“Roedd yn ysbrydoledig gallu rhannu fy mhrofiad gyda myfyrwyr ac i weld eu bod nhw’n gwrando yn astud a chymryd nodiadau ar ein hawgrymiadau, roedd yn wneud i fi deimlo fel person.”

“Rwy bob amser yn synnu faint o effaith y mae’n ei chael pan fydd myfyrwyr yn           gwrando ar ein straeon. Bydd yn rhaid iddyn nhw wneud penderfyniadau sy’n gallu newid bywydau teuluoedd. Gall effaith y penderfyniadau hyn fod yn syndod i weithwyr cymdeithasol.”

Dyfyniadau gan ein grŵp rhieni

Diolch yn fawr gan bawb.