Barn Gymharol: Sut mae pobl ifanc, rhieni a gweithwyr cymdeithasol yn asesu ansawdd ymarfer gwaith cymdeithasol?

Trosolwg

Cynhyrchodd yr astudiaeth dystiolaeth ynghylch beth mae rhieni, pobl ifanc a gweithwyr cymdeithasol yn ei ystyried yn ymarfer da, a sut mae hyn yn cymharu â system raddio sefydledig. Roedd hyn yn cynnwys gofyn i bobl sydd â phrofiad byw o wasanaethau cymdeithasol wrando ar enghreifftiau o ymarfer go iawn a rhannu eu barn.

Dyma’r astudiaeth gyntaf yn y byd i roi barn y rhai sy’n derbyn gwasanaethau gwaith cymdeithasol wrth galon ein dealltwriaeth o ymarfer da yn y ffordd hon. Caiff y canfyddiadau eu rhannu’n eang, a byddant yn llywio datblygiadau mewn polisi ac ymarfer yng Nghymru a thu hwnt, er enghraifft wrth lunio addysg gwaith cymdeithasol, fframweithiau ymarfer ac ymchwil yn y dyfodol.

Cwestiynau Ymchwil

1. A yw’r grwpiau’n nodi ffactorau tebyg neu wahanol wrth wneud penderfyniadau?
2. Pa mor gyson yw rhieni, pobl ifanc a gweithwyr cymdeithasol (o fewn grwpiau) yn eu barn ar ansawdd ymarfer gwaith cymdeithasol?
3. Beth yw lefel y cytundeb rhwng grwpiau ac â chodio arbenigol ar gyfer ansawdd ymarfer?
4. Beth mae pob grŵp yn ei ystyried yn bwysig wrth ddiffinio ansawdd ymarfer?

Gweithgareddau a Dulliau

Casglwyd recordiadau o 17 ymweliad teuluol o dri awdurdod lleol yng Nghymru. Cafodd y recordiadau eu hanonymeiddio gan y tîm ymchwil drwy dynnu enwau pobl a lleoedd a newid traw’r recordiad i ddiogelu hunaniaeth y cyfranogwyr.

Cynhaliwyd dau fath o ddadansoddiad: defnyddiwyd cynllun codio presennol o’r enw SWIM (Social Work and Interviewing Motivationally), yn ogystal â’r dull barn gymharol. Defnyddiodd y tîm ymchwil gynllun codio SWIM i werthuso ansawdd ymarfer gwaith cymdeithasol o safbwynt academaidd.

Mae barn gymharol yn ddull sydd wedi’i ddefnyddio’n helaeth ym maes addysg. Defnyddiwyd y dull hwn i gasglu barn grwpiau o rieni, pobl ifanc sydd â phrofiad o ofal, ac ymarferwyr gwaith cymdeithasol – sef yr aseswyr. Recriwtiwyd cyfanswm o 40 aseswr.

Gwrandawodd yr aseswyr ar barau o recordiadau, gan nodi pa un oedd yr enghraifft well o ymarfer gwaith cymdeithasol a pham. Gwnaeth pob aseswr sawl cymhariaeth, nes eu bod wedi gwrando ar bob recordiad o leiaf unwaith. Yn gyfan gwbl, gwnaed 573 o gymariaethau a gwrandawyd ar 22,000 o funudau o sain.

Cymharwyd safleoedd y tri grŵp â’i gilydd ac â SWIM drwy ddadansoddiad ystadegol. Hefyd, cynhelir dadansoddiad ansoddol o’r wybodaeth gyd-destunol ar gyfer pob recordiad a rhesymau’r aseswyr. Cynhaliwyd gweithgareddau gwneud synnwyr ar y cyd gyda phob grŵp o aseswyr a’n partneriaid Awdurdod Lleol i archwilio a mireinio’r canfyddiadau cychwynnol.

Canfyddiadau

Rydym ar hyn o bryd yn gweithio ar gwblhau’r canfyddiadau. Byddwn yn diweddaru’r dudalen hon gyda chyhoeddiadau wrth iddynt ddod ar gael.